Ma’lumki, har o‘quv yilida maktab o‘quvchilari o‘rtasida asosiy fanlardan olimpiadalar 4 bosqichda tashkil etiladi va unda g‘oliblikni qo‘lga kiritgan (1, 2, 3-o‘rinlar) o‘quvchilar taqdirlanadi.
Bu masala Umumiy o‘rta ta’lim tashkilotlari, akademik litsey va kasb-hunar maktablari o‘quvchilari o‘rtasida fan olimpiadalarini tashkil etish, o‘tkazish hamda xalqaro olimpiadalar ishtirokchilarini saralash va g‘oliblarni rag‘batlantirish tartibi to‘g‘risidagi Nizom bilan tartibga solinadi.
Mazkur nizomga binoan fan olimpidalari quyidagi bosqichlarda tashkil etiladi.
| Bosiqchlar | Tartibi | Muddati |
| birinchi bosqich | maktab, akademik litsey va kasb-hunar maktablar miqyosida | sentyabr oyida |
| ikkinchi bosqich | tuman (shahar) miqyosida | oktyabr oyida |
| uchinchi bosqich | Qoraqalpog‘iston Respublikasi, viloyatlar va Toshkent shahri miqyosida | noyabr oyida |
| to‘rtinchi bosqich | respublika miqyosida | aprel-may oylarida |
Ushbu fan olimpidalarining 3 va 4-bosqichlarida g‘oliblikni qo‘lga kiritgan o‘quvchilar quyidagicha taqdirlanadi.
1. Asosiy olimpiadaning uchinchi bosqichida g‘olib bo‘lgan har bir o‘quvchiga quyidagi miqdorda pul mukofotlari beriladi:
- 1-o‘rinni egallagan o‘quvchiga — bazaviy hisoblash miqdorining 6 baravari;
- 2-o‘rinni egallagan o‘quvchiga — bazaviy hisoblash miqdorining 4 baravari;
- 3-o‘rinni egallagan o‘quvchiga — bazaviy hisoblash miqdorining 3 baravari.
2. Asosiy olimpiadaning to‘rtinchi bosqichida g‘olib bo‘lgan har bir o‘quvchiga quyidagi miqdorda pul mukofotlari beriladi:
- 1-o‘rinni egallagan o‘quvchiga — bazaviy hisoblash miqdorining 12 baravari;
- 2-o‘rinni egallagan o‘quvchiga — bazaviy hisoblash miqdorining 8 baravari;
- 3-o‘rinni egallagan o‘quvchiga — bazaviy hisoblash miqdorining 6 baravari.
Shuni ham aytish kerakki, to‘rtinchi bosqichida 1, 2, 3-o‘rinlarni egallagan o‘quvchilarga ixtisoslik fani bo‘yicha davlat oliy ta’lim muassasalariga kirish imtihonlarida maksimal ball olish huquqini beruvchi va uch yil muddat davomida amal qiluvchi elektron sertifikatlar Vazirlik tomonidan beriladi va uning alohida elektron reyestri yuritiladi.
