Hech qanday huquq va tegishli hujjatlari bo‘lmagan yerdan foydalanish ma’muriy javobgarlikka sabab bo‘ladi.
Jumladan, Ma’muriy javobgarlik to‘g‘risidagi kodeksning 60-moddasi 2-qismiga muvofiq yer uchastkalarini o‘zboshimchalik bilan egallab olish, shu jumladan ushbu yer uchastkalariga nisbatan qonuniy huquqlari mavjud bo‘lmagan holda ulardan foydalanish:
- fuqarolarga bazaviy hisoblash miqdorining yigirma besh baravari;
- mansabdor shaxslarga esa — ellik baravari miqdorida jarima solishga sabab bo‘ladi.
Qoidaning mazmuniga ko‘ra, shaxs yer uchatkasiga huquqi (mulk huquqi, ijara, meros qilib qoldiriladigan umrbod egalik, doimiy foydalanish va egalik qilish va boshqa) mavjud bo‘lmay turib, ma’lum yer uchatkasini egallab olsa, undan foydalansa, yuqoridagi javobgarlik chorasi qo‘llaniladi.
Mazkur moddaning uchinchi qismiga muvofiq, o‘zboshimchalik bilan egallab olingan, ajratilgan yer uchastkasiga tutash bo‘lgan va tutash bo‘lmagan yer uchastkalarida qurilish ishlarini amalga oshirish:
- fuqarolarga bazaviy hisoblash miqdorining bir yuz ellik baravari;
- mansabdor shaxslarga esa — uch yuz baravari miqdorda jarima solishga sabab bo‘ladi.
E’tibor bering! Yer uchasklarini egallab olgan, shu jumladan, qonuniy huquqlari mavjud bo‘lmagan holda ulardan foydalangan shaxs ushbu huquqbuzarlikni birinchi marta sodir etsa va ushbu yer uchastkasini qaytarilishini ta’minlasa hamda o‘zboshimchalik bilan egallab olishning oqibatlarini bartaraf etsa, javobgarlikdan ozod etiladi.
Izoh:
2023-yil 1-dekabrdan boshlab esa O‘zbekiston Respublikasi Prezidentining 17.11.2023 yildagi PF-196-son Farmoniga ko‘ra bazaviy hisoblash miqdori 340 000 so‘m etib belgilangan.
