Yo‘llarda transport vositalari ko‘paygani sari avtotransport vositalarida harakatlanish ayrim qiyinchiliklarni keltirib chiqaradi. Bularga ayrim haydovchilarning huda-behudaga signal chalishlarini misol qilish mumkin.
Qonun chiqaruvchi va hukumat shunday holatlarning oldini olish uchun alohida qoidalarni ishlab chiqqanligini bilasizmi?
Yo‘l harakati qoidalarining 48-bandiga muvofiq faqat quyidagi hollardagina tovushli ishoralardan foydalanish mumkin:
- aholi punktlaridan tashqarida boshqa haydovchilarni quvib o‘tish haqida ogohlantirish uchun;
- zarur bo‘lgan hollarda yo‘l-transport hodisasining oldini olish uchun.
E’tibor bering! Yuqorida ko‘rsatilgan hollardan tashqari tovushli ishoralardan foydalanish taqiqlanadi va buning uchun ma’muriy javobgarlik mavjud.
Ma’muriy javobgarlik to‘g‘risidagi kodeksining 127-moddasiga ko‘ra, tovush signalini sababsiz berish, transport vositalariga uni ishlab chiqargan korxona nazarda tutmagan tovush chiqaruvchi va yorituvchi qurilmalarni o‘rnatish, xuddi shuningdek ularni o‘zgartirib o‘rnatish:
- bazaviy hisoblash miqdorining bir baravari miqdorida jarima solishga sabab bo‘ladi.
Xulosa qilib aytganda yuqoridagi 2 ta holatdan tashaqari signal chalsangiz jarimaga tortilasiz.
Izoh:
2023-yil 1-dekabrdan boshlab esa O‘zbekiston Respublikasi Prezidentining 17.11.2023 yildagi PF-196-son Farmoniga ko‘ra BHM 340 000 so‘m etib belgilangan.
