Bugungi kunda xodimlar va ish beruvchi munosabatlari davomida yuzaga keladigan ommaviy savollardan biri 12 yoshga to‘lmagan farzandlari bor ota-ona qo‘shimcha ta’til olish huquqiga egami ?
Mehnat kodeksining 401-moddasida quyidagicha belgilangan:
- O‘n ikki yoshga to‘lmagan ikki va undan ortiq bolaning yoki o‘n olti yoshga to‘lmagan nogironligi bo‘lgan bolaning ota-onasidan biriga (ota-ona o‘rnini bosuvchi shaxsga) har yili davomiyligi kamida to‘rt kalendar kun bo‘lgan haq to‘lanadigan qo‘shimcha ta’til beriladi.
Yuqorida nazarda tutilgan ta’til xodimning odatdagi yillik mehnat ta’tiliga qo‘shib berilishi yoki ish beruvchi bilan kelishgan holda alohida (to‘liq yoki qismlarga bo‘lib) muddatda berilishi mumkin.
E’tibor berish kerak bo‘lgan jihat shuki, mazkur qo‘shimcha ta’tildan faqat tegishli yildagina foydalanish mumkin. Ushbu ta’tilni keyingi ish yiliga ko‘chirish yoki pulli kompensatsiya bilan almashtirish mumkin emas.
Mazkur moddada xodimlar qo‘shimcha ta’til uchun ham haq olish huquqiga egaligi ko‘rsatilgan. Bundan tashqari Mehnat kodeksining 402-moddasiga ko‘ra o‘n ikki yoshga to‘lmagan bolalarning yoki o‘n olti yoshga to‘lmagan nogironligi bo‘lgan bolaning ota-onasidan biri yoki (ota-ona o‘rnini bosuvchi shaxs) ish haqi saqlanmagan holda ta’til olish huquqiga ham egadir.
Mazkur ta’tilni ham keyingi ish yiliga ko‘chirishga yo‘l qo‘yilmaydi.
Ushbu ikki moddani qo‘llashda ish beruvchi va xodimlar o‘rtasida ba’zi chalkashliklar bo‘lib turadi. Sababi har ikki modda ham bir xil jumlalarni ifodalaydi.
Ulardagi asosiy farq shundaki, 401-moddada nazarda tutilgan ta’til ish haqi saqlanishini, 402-modaddada nazarda tutilgan ta’til ish haqi saqlanmasligini nazarda tutadi.
