Ma’lumki, er-xotinning nikoh davomida orttirilgan mol-mulklar ularning umumiy mulki hisoblanadi. Bu Oila kodeksining 23-moddasida mustahkamlangan qoidadir.

Lekin yuqoridagi qoida mutloq hisoblanmay, qonunchilikda ayrim istesnolar ham mavjud.

Xususan, birinchi istesno Oila kodeksining 25-moddasiga qayd etilgan. Unga ko‘ra er va xotinning nikohga qadar o‘ziga tegishli bo‘lgan mol-mulki, shuningdek ulardan har birining nikoh davomida hadya, meros tariqasida yoki boshqa bepul bitimlar asosida olgan mol-mulki ulardan har birining o‘z mulki hisoblanadi.

Demak, er yoki xotinning nikohgacha (qonuniy nikoh) olgan har qanday mol-mulki u ko‘char yoki ko‘chmas mulk bo‘lishidan qat’iy nazar shaxsiy mulkdir.

Shuningdek, er yoki xotinga nikoh davrida meros tariqasida o‘tgan ko‘chmas mulklar (uy-joy, noturar joylar – binolar, inshootlar, mulkiy komplekslar – korxonalar) va boshqa ko‘char mulklar (misol uchun avtotransport) ularning xususiy mulki sanaladi.