Kontrakt va bog’cha uchun to’langan summalar soliqdan ozod
Soliq kodeksining 378-moddasi birinchi qismi 16-bandi soliq to‘lovchilarga o‘z daromadlarining ma’lum bir qismini ta’lim va tarbiya xarajatlariga yo‘naltirish imkoniyatini beradi va bu summalardan soliq olinmasligini belgilaydi.
1. Professional va oliy ta’lim uchun to‘lovlar:
Soliq to‘lovchining O‘zbekiston Respublikasidagi professional va oliy ta’lim tashkilotlarida ta’lim olish uchun o‘zining yoki yaqin qarindoshlari uchun amalga oshirgan to‘lovlari soliqqa tortilmaydi. Ushbu yaqin qarindoshlar quyidagilarni o‘z ichiga oladi:
- O‘zi;
- Farzandlari;
- Yigirma olti yoshga to‘lmagan er/xotini.
Shuningdek, agar ta’lim uchun tijorat banklaridan kredit olingan bo‘lsa, ta’lim krediti va uning foizlarini qoplash uchun yo‘naltirilgan daromadlar ham soliqdan ozod qilinadi.
Misol:
Soliq to‘lovchi o‘z farzandining oliy ta’limi uchun yil davomida 15 000 000 so‘m to‘lagan. Bu to‘lovlar soliqdan ozod qilingan bo‘lib, ushbu summa daromad solig‘iga tortilmaydi.
2. Nodavlat maktabgacha ta’lim tashkilotlari va/yoki maktablar uchun to‘lovlar:
Farzandlariga nodavlat ta’lim tashkilotlari ko‘rsatadigan xizmatlar uchun har bir farzand uchun oyiga 3 000 000 so‘mgacha bo‘lgan to‘lovlar soliqdan ozod qilinadi. Agar to‘lov oyiga 3 000 000 so‘mdan oshsa, faqat oshgan qismiga soliq solinadi.
Misol 1: (to‘lov 3 000 000 so‘m yoki kam bo‘lsa):
Soliq to‘lovchi farzandi uchun nodavlat maktabga oyiga 2 800 000 so‘m to‘lagan bo‘lsa, bu summa soliqqa tortilmaydi.
Yillik hisobda (12 oy) soliqdan ozod qilingan summa: 2 800 000 × 12 = 3 360 0000 so‘m
Misol 2: (to‘lov 3 500 000 so‘m bo‘lsa):
Soliq to‘lovchi farzandi uchun oyiga 3 500 000 so‘m to‘lagan. 3 000 000 so‘mgacha bo‘lgan qismi soliqdan ozod qilinadi, qolgan 500 000 so‘mga esa soliq solinadi.
Umumiy xulosa:
- Oliy va professional ta’lim uchun to‘lovlar, shuningdek ta’lim kreditlarini qoplash summalari soliqdan ozod qilinadi.
- Nodavlat maktabgacha ta’lim va/yoki maktablar uchun oyiga 3 000 000 so‘mgacha bo‘lgan to‘lovlar soliqdan ozod qilinadi. Oshgan qismiga esa 12% soliq solinadi.