Uyimga propiskaga qo’yilgan odamlarni chiqarsam bo’ladimi?

Ko‘pchilik uy egalarida shunday holat yuzaga kelishi mumkin: o‘z mulkida begona odamlar doimiy ro‘yxatdan o‘tgan bo‘lib chiqadi. Bunday vaziyatda ularni ro‘yxatdan chiqarish uchun sudga murojaat qilish shartmi yoki boshqa huquqiy yo‘llari bormi?

Vazirlar Mahkamasining 1049-sonli Qaroriga ko‘ra, quyidagi shaxslarni sudga murojaat qilmasdan turib, Ichki ishlar organlari huzuridagi Migratsiya va fuqarolikni rasmiylashtirish (MvaFR) bo‘limi orqali ro‘yxatdan chiqarish mumkin:
Uy egasining arizasiga ko‘ra, agar ro‘yxatga olingan shaxs:

• Uyga nisbatan hech qanday mulkiy huquqqa ega bo‘lmasa;
• Uy egasiga qarindosh bo‘lmasa;
• Uy-joydan foydalanish huquqi sud tomonidan belgilangan yoki taraflar o‘rtasida kelishilgan bo‘lmasa;
• O‘zbekiston Respublikasi Uy-joy kodeksiga binoan, ijtimoiy norma asosida ro‘yxatdan o‘tmagan bo‘lsa.

Bunday fuqarolarni chiqarish uchun ularning roziligi talab etilmaydi, ya’ni uy egasi o‘z xohishiga ko‘ra MvaFR bo‘limiga murojaat qilib, ularni ro‘yxatdan chiqarish huquqiga ega.

Qanday murojaat qilish kerak?

• 1️⃣ Pasport va mulk huquqini tasdiqlovchi hujjatlar bilan MvaFR bo‘limiga murojaat qilish
• 2️⃣ Ro‘yxatdan chiqarish uchun ariza topshirish
• 3️⃣ Ariza qabul qilingach, MvaFR organlari tegishli qaror chiqaradi va begona shaxslar ro‘yxatdan chiqariladi

Xulosa: Agar uy egasi mulkida doimiy ro‘yxatda bo‘lgan, lekin qarindoshi bo‘lmagan yoki uy-joyga mulkiy huquqqa ega bo‘lmagan shaxslarni ro‘yxatdan chiqarishni istasa, buni sudga murojaat qilmasdan amalga oshirishi mumkin.