Hozir ijtimoiy tarmoqlar orqalida har kuni minglab ma’lumotlar tarqatiladi. Ularning ko‘pchiligi shaxslar bilan bog‘liq. Kimdir kimnidir shaxsiy rasmlari, turli xil videolarini tarqatib yuboradi. Bunga esa asosan bloggerlar yordam beradi.
Biroq shu vaziyatda videoda shaxsning huquqlari buziladi. Ya’ni bunda o‘sha shaxsga doir ma’lumotlar uning ruxsatisiz tarqatiladi.
Shaxsga doir ma’lumot deganda muayyan jismoniy shaxsga taalluqli bo‘lgan yoki uni identifikatsiya qilish imkonini beradigan, elektron tarzda, qog‘ozda va (yoki) boshqa moddiy jismda qayd etilgan axborot tushuniladi.
Bu ma’lumotlar qatoriga shaxsiy ism-sharifi, yashash yoki ish joyi, uning tasviri, shuningdek u sir saqlanishidan manfaatdor bo‘lgan ma’lumotlar kiradi.
Bunday ma’lumotlarni tarqatgan har qanday shaxs esa javobgarlikka tortiladi.
Ma’muriy javobgarlik to‘g‘risidagi kodeks 46-2-moddasida shaxsga doir ma’lumotlarni qonunga xilof ravishda yig‘ish, tizimlashtirish, saqlash, o‘zgartirish, to‘ldirish, ulardan foydalanish, ularni berish, tarqatish, uzatish, egasizlantirish va yo‘q qilish,
- fuqarolarga bazaviy hisoblash miqdorining* uch baravaridan besh baravarigacha;
- mansabdor shaxslarga esa — besh baravaridan o‘n baravarigacha miqdorda jarima solishga sabab bo‘lishi belgilangan.
Agar ushbu harakatlar ma’muriy javobgarlik qo‘llanilgandan so‘ng 1 yil ichida takrorlansa, unda jinoiy javobgarlik chorasi qo‘llaniladi.
Izoh:
* 2023-yil 1-dekabrdan boshlab esa O‘zbekiston Respublikasi Prezidentining 17.11.2023 yildagi PF-196-son Farmoniga ko‘ra bazaviy hisoblash miqdori 340 000 so‘m etib belgilangan.
